මෙල්බන් නුවර වර්මොන්ට් (Vermont) ප්රදේශයේ නිවසක් තුළ ජූලි 7 වැනිදා පිහියෙන් ඇන ඝාතනය කළ 39 හැවිරිදි ලවන්යා චප්පා සිය පවුලේ සාමාජිකයන් විසින් ආදරණීය මවක්, දියණියක් සහ හිතවත් මිතුරියක් ලෙස සිහිපත් කර තිබෙනවා.
තාක්ෂණ ක්ෂේත්රයේ Software Quality Analystවරියක් ලෙස සේවය කළ ලවන්යා, වෘත්තීය කැපවීම සහ කරුණාවන්ත ස්වභාවය නිසා සිය සහෝදර සේවකයන් අතරද ඉතා ගෞරවයට පාත්ර වූ අයෙකු බවයි ඇයගේ පවුලේ ඥාතීන් පවසන්නේ.
සිද්ධිය සම්බන්ධයෙන් 39 හැවිරිදි වර්මොන්ට් ප්රදේශයේ පුද්ගලයෙකුට මිනීමැරුම් චෝදනා ගොනු කර ඇති අතර, සැකකරු මියගිය කාන්තාව හඳුනන අයෙකු බවට පොලිසිය විශ්වාස කරනවා.
ඝාතනය සිදුවන අවස්ථාවේ නිවසේ සිටි ඇයගේ කුඩා දරුවන් දෙදෙනාට ශාරීරික හානි කිසිවක් සිදුවී නොමැති බව වික්ටෝරියා පොලිසිය සඳහන් කළා.
ලවන්යාගේ ඥාතීන් ඉන්දියාවේ සිට ඔස්ට්රේලියාවට පැමිණ ඇති අතර, දරුවන්ගේ අනාගතය වෙනුවෙන් ආරම්භ කළ අරමුදල් රැස් කිරීමේ වැඩසටහනට මේ වන විට ඕස්ට්රේලියානු ඩොලර් 47,000කට වැඩි මුදලක් ලැබී තිබෙනවා.
පවුලේ සාමාජිකයන් පවසන්නේ, ලවන්යාගේ අහිමිවීම දරුවන්ට සහ පවුලට පියවාගත නොහැකි පාඩුවක් බවත්, ඇය සැමවිටම ආදරය, කරුණාව සහ කැපවීමෙන් පිරිපුන් පුද්ගලයෙකු ලෙස මතකයේ රැඳෙනු ඇති බවයි.
මෙම සිද්ධිය සම්බන්ධයෙන් වික්ටෝරියා පොලිසියේ මිනීමැරුම් විමර්ශන අංශය වැඩිදුර පරීක්ෂණ පවත්වන අතර, සැකකරු අධිකරණයට ඉදිරිපත් කිරීමට නියමිතයි.
