ශ්රී ලංකාවට සංචාරකයන් ආකර්ෂණය කර ගැනීමේ වැඩපිළිවෙළක් ලෙස රටවල් 40ක පුරවැසියන්ට ඊයේ (25) සිට නොමිලේ Tourist ETA පහසුකම ලබාදීමට රජය තීරණය කර තිබෙනවා.
ආගමන හා විගමන දෙපාර්තමේන්තුව නිවේදනය කළේ, මෙම නොමිලේ Electronic Travel Authorization (ETA) පහසුකම දින 30ක කාලයක් සඳහා දෙවරක් ඇතුල්වීමේ (Double Entry) අවසරය සමඟ ලබාදෙන බවයි.
මෙම සහනය හිමිවන රටවල් අතර ඔස්ට්රේලියාව, ඉන්දියාව, චීනය, ඇමරිකාව, බ්රිතාන්යය, කැනඩාව, නවසීලන්තය, ජපානය, දකුණු කොරියාව සහ ජර්මනිය ඇතුළු රටවල් 40ක් ඇතුළත්.
මීට අමතරව මාලදිවයින, සීෂෙල්ස් සහ සිංගප්පූරුවේ පුරවැසියන්ටද පෙර පරිදි නොමිලේ ETA පහසුකම් හිමිවනවා.
කෙසේවෙතත් ශ්රී ලංකාවට පැමිණෙන සියලුම විදේශිකයන්, විශේෂ රාජ්යතාන්ත්රික සහ නිල ගමන් බලපත්ර හිමියන් හැර, පැමිණීමට පෙර ETA අනුමැතිය ලබාගත යුතු බවද ආගමන හා විගමන දෙපාර්තමේන්තුව සඳහන් කළා.
එමෙන්ම දින 30කට වැඩි කාලයක් ශ්රී ලංකාවේ රැඳී සිටීමට අවශ්ය සංචාරකයන්ට අදාළ ගාස්තු ගෙවා වීසා දිගුවක් ලබාගත හැකි බවද දැනුම් දී තිබෙනවා.
