ඔස්ට්රේලියාව සහ ජපානය අතර ආරක්ෂක සහයෝගීතාව තවදුරටත් ශක්තිමත් කිරීම සඳහා නව වසර දහයක ගිවිසුමකට දෙරට එකඟ වී තිබෙනවා.
මෙම ගිවිසුම යටතේ ජපානයට ඔස්ට්රේලියාවේ දුරස්ථ පරීක්ෂණ ප්රදේශ භාවිත කරමින් නව ආරක්ෂක තාක්ෂණයන් අත්හදා බැලීමට අවස්ථාව ලැබෙනු ඇති.
Canberra හි පැවති ඉහළ පෙළේ ආරක්ෂක සාකච්ඡාවලදී දෙරටේ ආරක්ෂක අමාත්යවරුන් මෙම සහයෝගීතාව පිළිබඳ තීරණය ප්රකාශයට පත් කළ අතර, ඔස්ට්රේලියාව සහ ජපානය අතර ආරක්ෂක සබඳතා තවදුරටත් පුළුල් කිරීම පිළිබඳවද සාකච්ඡා කර තිබෙනවා.
ඔස්ට්රේලියාව සහ ජපානය එක්ව සංවර්ධනය කළ ඉහළ ශක්ති ලේසර් ආරක්ෂක පද්ධතියක් සම්බන්ධ පරීක්ෂණ සාර්ථකව අවසන් කිරීමත් මෙම සාකච්ඡාවලදී විශේෂ අවධානයක් දිනාගත් කරුණක්.
උතුරු කොරියාවේ මිසයිල වැඩසටහන සහ රුසියාව සමඟ එරට පවත්වාගෙන යන සහයෝගීතාව සම්බන්ධයෙන්ද දෙරටේ ආරක්ෂක අමාත්යවරුන් අතර අදහස් හුවමාරු වී ඇති බවටයි වාර්තා වන්නේ.
මේ අතර, ඔස්ට්රේලියානු අග්රාමාත්ය Anthony Albanese ජපාන දේශපාලනඥයෙකු සම්බන්ධයෙන් කළ මතභේදාත්මක ප්රකාශය මෙම ආරක්ෂක සාකච්ඡාවලදී මතු නොවූ බව ජපාන ආරක්ෂක අමාත්ය Shinjiro Koizumi සඳහන් කළා.
කෙසේවෙතත් ආරක්ෂක තාක්ෂණය, හමුදා පුහුණුව සහ ඒකාබද්ධ ආරක්ෂක වැඩසටහන් තවදුරටත් පුළුල් කරමින් ඔස්ට්රේලියාව සහ ජපානය අතර සබඳතා ඉදිරියේදී තවත් ශක්තිමත් කිරීමට දෙරට සූදානම් බවටයි වාර්තා වන්නේ.
