ඕස්ට්‍රේලියාවේ පූර්ව ළමාවිය අධ්‍යාපන සහ ළමා සුරැකුම් ක්ෂේත්‍රයේ (Early Childhood Education and Care) නිරත සේවකයින් 210,000කට අධික පිරිසක් සඳහා පනවා තිබූ 15% ක වැටුප් වර්ධකය තවත් වසර දෙකකින්, එනම් 2028 වසරේ අග භාගය දක්වා දීර්ඝ කිරීමට ෆෙඩරල් රජය තීරණය කර තිබෙනවා.

ප්‍රධාන අමාත්‍ය මණ්ඩලය විසින් මෙම තීරණය ප්‍රකාශයට පත් කර ඇත්තේ, ලබන ජූලි 15 වනදාට සැලසුම් කර තිබූ දැවැන්ත සේවක වැඩවර්ජනයකට සති කිහිපයකට පෙරයි.

මෙම වැටුප් වර්ධකය දීර්ඝ කිරීම වෙනුවෙන් ඕස්ට්‍රේලියානු රජය වැය කිරීමට අපේක්ෂිත මුදල ඩොලර් බිලියන 3.6ක්.

අග්‍රාමාත්‍ය Anthony Albanese ප්‍රකාශ කළේ දරුවන්ට ජීවිතයේ හොඳම ආරම්භය ලබා දෙන්නේ පූර්ව ළමාවිය අධ්‍යාපනඥයින් බැවින්, ඔවුන්ට සාධාරණ වැටුපක් හිමිවිය යුතු බවයි.

මෙම නව තීරණයත් සමඟ සාමාන්‍ය පූර්ව ළමාවිය සේවකයෙකුට සතියකට අතිරේකව ඩොලර් 196ක මුදලක් හිමිවනවා.

මෑතකදී සිදුකළ අවම වැටුප් සංශෝධන ද ඇතුළත් වූ විට එය සතියකට ඩොලර් 255ක් දක්වා ඉහළ යනු ඇති.

එමෙන්ම පූර්ව ළමාවිය ගුරුවරුන් සඳහා සතියකට ඩොලර් 410ක වැටුප් වර්ධකයක් හිමිවන බවයි අධ්‍යාපන අමාත්‍ය Jason Clare පවසන්නේ.

කෙසේ වෙතත්, රජය මගින් ලබාදෙන මෙම සහනාධාර වැටුප් වර්ධකය හිමිවන්නේ දෙමාපියන්ගෙන් අය කරන ගාස්තු සීමා කිරීමට එකඟ වන සහ ජාතික ආරක්ෂණ ප්‍රමිතීන්ට (National Safety Standards) අනුකූලව කටයුතු කරන ආයතන සඳහා පමණක් බව ද ඕස්ට්‍රේලියානු රජය අවධාරණය කර සිටිනවා.