ඔස්ට්‍රේලියාවේ උද්ධමන අගය නැවතත් බලාපොරොත්තු වූ මට්ටමට වඩා ඉහළ ගොස් ඇති අතර, මේ හේතුවෙන් ඉදිරි මාසවලදී පොලී අනුපාතය තවත් වරක් ඉහළ දැමීමට Reserve Bank එකට සිදුවනු ඇතැයි අනාවැකි පළ වනවා.

Australian Bureau of Statistics (ABS) නිකුත් කළ නවතම දත්ත අනුව, ජනවාරි මාසය දක්වා මාස 12ක කාලය තුළ Consumer Price Index (CPI) සියයට 3.8ක් ලෙසයි වාර්තා වී ඇත්තේ.

මෙය දෙසැම්බර් මාසයේ අගය සමඟ සමාන වුවද, ආර්ථික විශේෂඥයන් බලාපොරොත්තු වූ සියයට 3.7ට වඩා ඉහළ අගයක් වනවා.

ඒ සමඟම RBA විසින් වැඩි අවධානය යොමු කරන “core inflation” ලෙස සැලකෙන trimmed mean අගයද සියයට 3.4ක් දක්වා ඉහළ ගොස් ඇති අතර, එයද අපේක්ෂිත අගයට වඩා වැඩියි.

මෙම අගයන් දෙකම RBA ඉලක්ක කරගත් සියයට 2 – 3 පරාසයට වඩා ඉහළ මට්ටමක පවතිනවා.

බොහෝ ආර්ථික විශේෂඥයින් සහ වෙළඳපොළ විශ්ලේෂකයින් පවසන්නේ, මැයි මාසයේ පැවැත්වෙන RBA රැස්වීමේදී පොලී අනුපාතය තවත් ඉහළ යාමේ ඉඩකඩ ඉතා වැඩි බවයි.

කෙසේවෙතත්, මෙම දත්ත මාසික දත්ත වන බැවින්, මාර්තු මාසයේ පැවැත්වෙන RBA රැස්වීමේදී පොලී අනුපාතය ස්ථිරව තබා ගැනීමට හැකි බවත් සඳහන් වනවා.

RBA පවසන්නේ, තීරණාත්මක ලෙස සලකා බැලිය යුත්තේ අප්‍රේල් මාසයේ නිකුත් වන ත්‍රයිමාසික උද්ධමන දත්ත බවයි.

ආර්ථික විශේෂඥයින් අනතුරු අඟවන්නේ, උද්ධමනය සැලකිය යුතු ලෙස අඩු නොවන්නේ නම්, මේ වසර තුළ තවත් පොලී වැඩිවීමක් සිදු විය හැකි බවයි.