ඔස්ට්‍රේලියාවේ Victoria ප්‍රාන්තයේ council සේවකයන් සහ ප්‍රාදේශීය පාලන ආයතන අතර වැටුප් සම්බන්ධයෙන් පවතින ගැටුමක් හේතුවෙන් කසළ එකතු කිරීමේ සේවාවන්ට බාධා එල්ල විය හැකි බවට අනතුරු ඇඟවීම් නිකුත් කර තිබෙනවා.

සේවකයන් පවසන්නේ මාස හයකට අධික කාලයක් ගතවී ඇතත් තමන්ට කිසිදු නව වැටුප් යෝජනාවක් ඉදිරිපත් කර නොමැති බවයි.

Australian Services Union (ASU) නියෝජනය කරන සේවකයන් 1,500කට අධික පිරිසක් ජුනි 17 වනදා යළි වෘත්තීය ක්‍රියාමාර්ගයකට එළඹීමට සැලසුම් කර ඇති අතර, එකඟතාවකට පැමිණීමට නොහැකි වුවහොත් කසළ බඳුන් හිස් කිරීම, වීදි පිරිසිදු කිරීම සහ parking enforcement සේවාවන්ට බලපෑම් එල්ල විය හැකි බවටයි වාර්තා වන්නේ.

සේවකයන් පවසන්නේ ජීවන වියදම සීඝ්‍රයෙන් ඉහළ යාම හේතුවෙන් තම වැටුප් ප්‍රමාණවත් නොවන බවයි.

තම වැටුප ජීවන වියදමට සාපේක්ෂව සියයට 14ක පමණ පසුබෑමක පවතින බවත්, “එය අපව දැඩි ලෙස පීඩාවට පත් කරනවා” යනුවෙනුත් එක් සේවකයෙකු ප්‍රකාශ කර තිබෙනවා.

මෙම ගැටුම Melbourne, Darebin, Hume, Merri-bek, Yarra, Maribyrnong, Hobsons Bay සහ Greater Dandenong ඇතුළු council ප්‍රදේශ කිහිපයකට බලපාන අතර, ඇතැම් ප්‍රදේශවල කසළ බඳුන් දහස් ගණනක් එකතු නොවී තිබූ අවස්ථාද මීට පෙර වාර්තා වී තිබුණා.

කෙසේ වෙතත් Victoria රජය පවසන්නේ rate cap ප්‍රතිපත්තිය පවුල්වල ජීවන වියදම් පීඩනය අවම කිරීම සඳහා ක්‍රියාත්මක කරන බවයි.

එමෙන්ම සම්බන්ධ council ආයතන සහ වෘත්තීය සමිති අතර සාකච්ඡා හරහා විසඳුමක් සොයාගැනීමට අපේක්ෂා කරන බවද ඔවුන් සඳහන් කර තිබෙනවා.