වික්ටෝරියාවේ සතුන් අතගෑමට අවස්ථාව ලබාදෙන ස්ථානයකට ගිය දරුවන් දෙදෙනෙකු Shiga toxin-producing E. coli (STEC) නමැති බරපතළ බැක්ටීරියා ආසාදනයකට ලක්වීමෙන් සෞඛ්ය අංශ විශේෂ අනතුරු ඇඟවීමක් නිකුත් කර තිබෙනවා.
ආසාදිත දරුවන් අතර වයස අවුරුදු තුනක දරුවෙකුට මොළයට ස්ථිර හානි සහ වකුගඩු අකර්මණ්යතාව ඇතිවී ඇති අතර, ඉදිරියේදී වකුගඩු බද්ධ කිරීමක් අවශ්ය විය හැකි බවයි වාර්තා වන්නේ.
වයස අවුරුදු දෙකක් වන තවත් දරුවෙකු මෙම ආසාදනයෙන් පසු සති තුනක් දැඩි සත්කාර ඒකකයේ ප්රතිකාර ලබාගෙන තිබෙනවා.
STEC බැක්ටීරියාව විශේෂයෙන් ගවයන් ඇතුළු සතුන්ගේ මළ ද්රව්යවල තිබිය හැකි අතර, සතුන් සමඟ සම්බන්ධ වීම, දූෂිත ආහාර හෝ ජලය සහ අත් නිසි ලෙස නොසේදීම හරහා මිනිසුන්ට පැතිරිය හැකියි.
මෙම ආසාදනයෙන් දැඩි බඩේ වේදනාව, වමනය සහ ලේ සහිත පාචනය වැනි ලක්ෂණ ඇතිවිය හැකි අතර, ඇතැම් අවස්ථාවල Haemolytic Uraemic Syndrome (HUS) නමැති වකුගඩුවලට දැඩි හානි කරන තත්ත්වයක් ද ඇතිවිය හැකියි.
විශේෂයෙන් වයස අවුරුදු පහට අඩු දරුවන්ට බරපතළ සංකූලතා ඇතිවීමේ අවදානම වැඩි බැවින්, සතුන් අතගෑමෙන් පසු සබන් සහ ජලයෙන් අත් හොඳින් සේදීම අත්යවශ්ය බවයි සෞඛ්ය බලධාරීන් දෙමාපියන්ට අවධාරණය කරන්නේ.
දරුවෙකුට සතුන් සමඟ සම්බන්ධ වීමෙන් පසු දැඩි පාචනය, ලේ සහිත මළපහ, වමනය හෝ අසාමාන්ය ලෙස දුර්වල වීමක් පෙනේ නම් ඉක්මනින් වෛද්ය උපදෙස් ලබාගැනීම වැදගත් බවද සෞඛ්ය අංශ පවසනවා.
