ඔස්ට්රේලියාවේ ප්රධාන බැංකු 10ක් හරහා ඩොලර් මිලියන සිය ගණනක් වටිනා සැකකටයුතු නිවාස ණය ලබාගෙන ඇති බව AUSTRAC විසින් සිදුකළ විශේෂ පරීක්ෂණයකින් අනාවරණය වී තිබෙනවා.
Operation Claw ලෙස නම්කර ඇති මෙම පරීක්ෂණයේදී හඳුනාගෙන ඇත්තේ, විශේෂයෙන් Sydneyහි දේපළ මිලදී ගැනීම් සම්බන්ධයෙන් සිදුකළ නිවාස ණය වංචා සහ බැංකු ණය ලබාදීමේ ක්රමවේදවල දුර්වලතා පවතින බවයි.
මෙවැනි ණය අයදුම්පත්වලදී ආදායම වැඩි කර පෙන්වීම, රැකියා තොරතුරු වැරදි ලෙස ඉදිරිපත් කිරීම සහ ව්යාපාරික ආදායම් සම්බන්ධ ව්යාජ තොරතුරු ලබාදීම සිදුව ඇති බව AUSTRAC පවසනවා.
ඇතැම් අවස්ථාවල විදේශයන්ගෙන් හෝ වෙනත් තෙවන පාර්ශ්වයන්ගෙන් ලැබුණු මුදල් දේපළ ගනුදෙනු අවසන් කිරීම සහ නිවාස ණය වාරික ගෙවීම සඳහා භාවිත කර ඇති බවද අනාවරණය වී තිබෙනවා.
AUSTRAC පවසන්නේ මෙම පරීක්ෂණයෙන් ඔස්ට්රේලියාව පුරා විශාල පරිමාණයේ මුදල් විශුද්ධිකරණයක් සිදුවන බවට සාක්ෂි හමු නොවූ නමුත්, හෙළිවූ දුර්වලතා අපරාධකරුවන්ට මූල්ය පද්ධතිය අයුතු ලෙස භාවිත කිරීමට ඉඩ සැලසිය හැකි බවයි.
මෙම පරීක්ෂණයට ATO, NSW Police, NSW Crime Commission, Australian Criminal Intelligence Commission, APRA සහ ASIC ඇතුළු ආයතනද එක්ව කටයුතු කර තිබෙනවා.
ව්යාජ ලේඛන භාවිත කර නිවාස ණය අයදුම් කළ පුද්ගලයන් පිළිබඳ තොරතුරු අදාළ බලධාරීන් වෙත යොමු කර ඇති අතර, බැංකු සිය ණය අනුමත කිරීමේ පරීක්ෂණ තවත් දැඩි කළ යුතු බවයි AUSTRAC අනතුරු අඟවන්නේ.
