තායිලන්තයේ Pattaya ප්රදේශයේදී 17 හැවිරිදි තරුණියක ඝාතනය කිරීම සම්බන්ධයෙන් අත්අඩංගුවට ගත් ඔස්ට්රේලියානු ජාතිකයා පිළිබඳ පරීක්ෂණ අවසන් අදියරට පැමිණ ඇති බව තායිලන්ත පොලිසිය පවසනවා.
අදාළ තරුණියගේ මරණයට හේතුව ශ්වසන මාර්ගය සිරවීම බවයි පශ්චාත් මරණ පරීක්ෂණ වාර්තාවෙන් අනාවරණය වී ඇත්තේ.
පසුගිය ජූනි මාසයේදී Pattaya වෙරළ ආසන්න දුම්රිය මාර්ගයක් අසල තිබී සොයාගත් සූට්කේසයක තිබී, Tunchanok Donhomla නමැති 17 හැවිරිදි තරුණියගේ සිරුර හමුවුණා.
මෙම ඝාතනය සම්බන්ධයෙන් 45 හැවිරිදි Simon Carman නමැති ඔස්ට්රේලියානු ජාතිකයා චෝදනා ලබා සිටින අතර ඔහු බැංකොක්හි Suvarnabhumi ගුවන්තොටුපළෙන් ඔස්ට්රේලියාව බලා පිටත්වීමට උත්සාහ කිරීමේදී අත්අඩංගුවට පත්වුණා.
Pattaya නගරයේ පොලිස් අධිකාරීවරයා වාර්තා කර ඇත්තේ මියගිය තරුණියගේ හිසට තුවාල සිදුවී ඇති අතර ඇගේ මරණයට සෘජු හේතුව හුස්ම හිරවීම බවයි.
මේ අතර ඇගේ සිරුරේ තිබී සැකකාර ඔස්ට්රේලියානු ජාතිකයාගේ DNA ද හමුවී තිබෙනවා.
මුදල් ආරවුලක් මත මෙම ඝාතනය සිදුවී ඇති අතර, තම ආත්ම ආරක්ෂාව සඳහා ක්රියා කළ බවයි සැකකරු පවසා ඇත්තේ.
කෙසේ වෙතත්, ඔහුට එරෙහිව මිනීමැරීම, බාලවයස්කාරියක ලිංගික අරමුණු සඳහා පැහැර ගැනීම සහ මළසිරුර සඟවා තැබීම යන චෝදනා යටතේ නඩු පවරා ඇති අතර, තායිලන්ත නීතියට අනුව ඔහුට ජීවිතාන්තය දක්වා සිරදඬුවමක් හෝ මරණ දඬුවම හිමිවීමේ අවදානමක් පවතිනවා.
මෙම නඩුවට අදාළ පොලිස් පරීක්ෂණ වාර්තා ඉදිරි දින කිහිපය තුළ නීතිපතිවරයා වෙත භාරදීමට ද තායිලන්ත පොලිසිය සූදානම් වනවා.
