Victoria ප්‍රදේශ රැසකට අද දැඩි සුළං පිළිබඳ අනතුරු ඇඟවීමක් නිකුත් කර ඇති අතර, Melbourne ඇතුළු ප්‍රදේශවලටද එම තත්ත්වය බලපානු ඇති බව Bureau of Meteorology දැනුම් දෙනවා.

Central, North Central, North East, West and South Gippsland සහ East Gippsland ප්‍රදේශවල පැයට කිලෝමීටර් 60ත් 70ත් අතර වේගයකින් සුළං හමන අතර, ඇතැම් ප්‍රදේශවල පැයට කිලෝමීටර් 90ක් පමණ දක්වා සුළං වේගවත් විය හැකියි.

අද උදෑසන Mount Hotham ප්‍රදේශයෙන් පැයට කිලෝමීටර් 94ක සුළං වේගයක්ද වාර්තා වී ඇති අතර, කඳුකර ප්‍රදේශවල තත්ත්වය වඩාත් දරුණු විය හැකි බව සඳහන්.

Melbourne සහ Mornington Peninsula හා Bellarine Peninsula ප්‍රදේශවලටද මෙම දැඩි සුළං තත්ත්වය පැතිර යා හැකි අතර, දහවල් වන විට සුළං තත්ත්වය ක්‍රමයෙන් අඩුවනු ඇතැයි අපේක්ෂා කරනවා.

මේ අතර Victoria ප්‍රදේශ කිහිපයකට වැසි සහ ගිගුරුම් සහිත වැසිද ඇතිවෙමින් පවතින අතර, Bendigo ප්‍රදේශයට අද දහවල් වන විට මිලිමීටර් 14.6ක වැසි ප්‍රමාණයක් වාර්තා වී තිබුණා.

දැඩි සුළං හේතුවෙන් ගස් කඩා වැටීම, විදුලි රැහැන්වලට හානි සිදුවීම සහ ගමනාගමනයට බාධා ඇතිවීමේ අවදානමක් පවතින බැවින් ජනතාව අවධානයෙන් සිටින ලෙස බලධාරීන් උපදෙස් ලබා දෙන්නේ.

විශේෂයෙන්ම එළිමහනේ ඇති ලිහිල් භාණ්ඩ ආරක්ෂිතව තබාගැනීමටත්, සුළං තත්ත්වය දරුණු වන අවස්ථාවල අනවශ්‍ය ගමන්වලින් වැළකී සිටීමටත් ජනතාවට දැනුම් දී තිබෙනවා.